Suðvesturlínur - verkefnavefur

Á fimmta tug gesta sóttu opið hús Landsnets í Reykjanesbæ í gær þar sem kynnt var tillaga að matsáætlun vegna fyrirhugaðar styrkingar raforkukerfisins á Suðvesturlandi, allt frá Hellisheiði að Reykjanesvirkjun. Opið hús um tillöguna verður í Vogum á Vatnsleysuströnd í dag og Hafnarfirði á morgun.

Kynningin í Reykjanesbæ fór fram í Virkjun á Vallarsvæðinu og mætti dágóður hópur með bæjarstjórann, Árna Sigfússon, í broddi fylkingar, strax klukkan þrjú til að hlíða á útskýringar starfsmanna Landsnets og EFLU verkfræðistofu, sem verkstýrir matsvinnunni fyrir Landsnet.

Opna húsið stóð yfir í fjóra tíma og voru fyrirspurnirnar hinar fjölbreyttustu, að sögn Ólafs Árnasonar, verkefnisstjóra umhverfismatsins. Var m.a. spurt um fyrirhugaðan framkvæmdatíma verkefnisins, áfangaskiptingu þess, fyrirkomulag útboða og skiptingu þeirra, kostnaðarmál, línuleiðir, matsferlið sjálft og áherslur, bæði í umhverfismálum og matsáætluninni sjálfri.Margir voru einnig að velta fyrir sér sýnileika háspennulínanna og mastragerðum.

Næsta kynning á matstillögunni er í dag, laugardag, í Stóru Vogaskóla í Vogum, milli kl. 15 og 19 og á sama tíma í Hafnarfirði á morgun, sunnudaginn 8. febrúar, í Haukahúsinu að Ásvöllum.